[Christa1]

Mer Pälzer un die Weltachs (von Paul Münch)

Wenn jemand uf de Infall käm,
Die Achs vun unserm Weltsyschtem
Genaa un dipplich auszurechne
Un in die Landkart inzuzeechne,
Do käm's eraus, daß akkerat
Im Mittelpunkt vum Pälzer Staat
Der Punkt leit, der wo ganz gewiß
Die Hauptsach uf 'em Weltall is
Der Punkt, wo alles sich drum dreht,
Was uf der weite Welt besteht.

Dort werd die Weltachs ingeschmeert
Un ufgebaßt, daß nix passeert.

Was in de Weltelaaf am End
E kleeni Sterung bringe kennt....

Schun seit der Herr die Welt gebaut,
Is uns die Weltachs anvertraut,
Weil meer vun alle Menschenrasse
For so e Amt am beste basse.
Mer bassen uf, mer halten Wacht,
Mer gewen Dag und Nacht druf acht,
Daß niemand kummt un will se stehle.
Mer schmere se un dun se öle
Un butzen se als glitzeglatt
Mit Glaspapier un Butzpumad.

Drum dreht sich a wie selbschtverständlich
Die Weltachs ewig un unendlich.

O weh! O weh! Wäre das e Schlag,
Wann plötzlich ame scheene Dag
Mer Pälzer Leit de Rappel kräte
Un mir nix, dir nix streike däte!
Das Unglick wär nit auszumole:
Do dät uns all de Guguck hole:
Die Erd, die Sunn, de Mond un alles,
Das krät am selbe Dag de Dalles.

Im ganzen Weltall dät's do bollere
Un alles durchenanner kollere.
Do gäb's ee Riesekuddelmuddel,
Die Milchstroß gäb e Mordsgeschnuddel
Un all das scheene Schöpfungs-Sach
Hätt alles rutzebutz die Krach.

Un drum sa't unser Herrgott a
Schun glei am vierte Schöpfungsda':
"So", sa't er, "Mond und Stern un Sunn.
Die drehe sich un glitzre schun,
Mei Weltachs schnerrt, 's is grad e Spaß,
Als wie e Triller uf de Gass.

Jetzt braicht ich Mensche, wo's verstehn
Mit meiner Weltachs umzugehn,
Wo Kerl sin erschter Qualidät
Un Riese an Geschmeidigkeet,
Mit Hern im Kopp, mit Pflicht un Ehr,
Korzum! Die Pälzer missen her;
Die missen dann die Weltachs schmeere
Un's Kugellager repareere."

"Un" - sa't er - "dann werd's ingericht",
Daß alles in der Weltgeschicht.

Beim Pälzer Volk im Pälzer Staat
Sein Ursprung un sein Fortgang hat"
So sat' er. Un so is es kumm.
Un um die Weltachs runderum,
Do hockt seit viele dausend Johr
Sei Pälzer Volk und sorgt defor
Bei Dag un Nacht un frih und spät,
Daß Gottes Weltplan richtig geht,
Un daß es Weltall werd gelenkt,
So wie sich's Gott hat ausgedenkt.

Un was nit in der Palz basseert,
Is Newesach un hat kee Wert.





So, der Beweis!

LG Christa J.