Na, dann will ich doch mal wieder die Schmunzelecke etwas "entschärfen"
mit meinem Beitrag, auch wieder von Toni Lauerer!!!!
Werde auch versuchen, daß ich die niederbayerische Mundart für "Nordlichter" etwas verständlicher umsetzen und schreiben kann und hoffe, daß es auch alle verstehen, ok???


Im Alltag kommt es tausendfach zu zufälligen flüchtigen Begegnungen. Ein
Gespräch ergibt sich dabei selten, aber man macht sich so seine Gedanken.
So auch der Paul, ein Mann im besten Ater, verheiratet, drei Kinder. Er sitzt
alleine im Straßencafe, vorsichtshalber ohne Ehering, und genießt sein gemischtes Eis mit Pils, als sich eine atemberaubende Blondine zwei Tische weiter von ihm entfernt hinsetzt.
Was sich daraufhin unhörbar, aber intensiv ereignet, ist ..........


Da stumme Gespräch


Paul:
Jo, mi host g'haut! Jo mi läckst! A so a Super-Weib! Wie old werd
die wohl sein? Dreiazwanzge? Vierazwanzge? Fünfazwanzge? Und der Rock! Sowos vo kurz! Und de Feiß! Sowos vo long! Uiuiuiuiui, i glab, i wer narrisch, etz schaut's a no her zu mir!

Sie:
Etz konn i mi in die pralle Sunna setzn, weil der Depp do hintn unterm Sonnaschirm sitzn mouß. Warum schaut denn der so bläd her zu mir?
Hod's der net alle?

Paul:
Guat, daß i heit mei rots Kappl aufhob. Do siechtma erschtens mei Plattn ned
und zwoatens schau I überhaupt richti flott damit aus. Wei die herschaut zu mir! Mi beidlts direkt, aso schaut die her! Guat, i man, i schau natürli a ned schlecht aus! Des mou i ganz objektiv sogn. Und die junga Derndln suchn heitzudogs Manner mit Erfahrung, des is ja bekannt. So gseng is koa Wunder
ned, daß sie herschaut zu mir. Etz, wenn's no a Weil herschaut, na loch i hi zu ihra. Do kenn i nix!

Sie:
Der schaut awl no so bläd! Also, der Verkäufer, der wo eam des Kappl verkafft hod, der mou a Genie sein. A so a Idioten-Deckl! (sieht sich um)
Wou bleibt'n blouß d'Bedienung?

Paul:
Glei loch i hi! Die wenn no weida herschaut zu mir, nacha loch i hi. Saxndi,
etz isma a Botzn Eis aafs Hosndürl draffg'folln vor lauta Hischaun.
(Schwärmerisch) Omei, Derndl, aa, wenn i Dir g'foll: Etz is z'spät! I bin verheirat, hob drei Kinder und an Bandscheibnvorfall. Vor zwanzg Johr
wennst kemma wärst, dann hättsd a Chance g'habt. Obwohl, vor zwanzg Johr, do worst jo erst drei oder vier Johr olt, des wär aa a Schmarrn g'wen.

Sie:
Etz is eahm 's Eis owag'folln, dem Blädl, dem saudumma! Etz hoda wenigstens wos zum dou, weil er sei Hosn putzn mou. Na konn er ned dauernd zu mir hergaffn. Der soll ned so vül Eis essn, hod eh a drumm Wampn dro. Mensch, etz is mir da rechte Fouß eigschloffn.

Paul:
I wer narrisch! Etz hods d'Feiß iwaranandagschlogn und i hobs gseng. I hob einiges gseng in meim Lebn, owa sowos hob i no ned gseng. Mensch, Meier, is der Rock kurz! A weng anders wenn i sitzn daad, dann sehert i no besser hi. Der scheiß Sonnaschirm stört aa. Die wüll mi reizn! I kenn des, die wüll mi reizn aaf Deifl kumm raus. Des hob i im Urin. Oh mei, Derndl, des hülft alles nix. I bin leider nimma frei.

Sie:
Etz wenn der no länger so saubläd herschaut, nacha geh i! Bedienung kummt a koane. Saftlodn! Wahrscheinli is des a überbliebna Junggsell, der wo an ganzn Doch bloß in da Stodt umananderlurt. Dassa ned normal und ned ganz echt is, des sieht ma scho do dro, daß er zum Eis a Bier trinkt! Pfui Deifl!!!

Paul:
Wohrscheinli hods grod Schluß gmacht mit ihrm Freind. Des werd irgend aso a junger Hupfer sein ohne Geld und ohne Charakter. Derwischn wenn i den dou, nacha batz i eahm a Gscheide! Aso a damischer Hundling! Etz sucht's natürli en reifn Moo, der wous verwöhnt. Des hod a so a Superfrau aa verdient. I kannt ihr scho wos bietn. Ned bloß körperlich, naa, aa materiell. I moan, mei Weib und manne Kinder, die müßert ma natürli vorübergehend ausklammern. Die kannt derweil aaf Kur geh. Do gibts nämli so Heime, do konn ma d' Kinder
mitnehma. Regeln loßtse alls, wenn ma wüll. Wie werd's denn hoaßn, des Derndl? Die hod bestimmt an schena Nama. Gabi? Carina? Sonja? Oder gor
Jennifer? (Stutz) Ja, wos is etz des für Oaner???


Ein sehr attraktiver, schlanker, blonder, junger Mann kommt zur Blondine an den Tisch und gibt ihr einen Kuss auf die Lippen.


Mann:
Grüaßdi, Berta-Maus!

Paul:
Ha!!! Die zwoa, die passnd zamm! Blond und bläd!!! Irgendwie hob i glei g'wißt, daß des koa Gscheide is!!!

_____________________

Ich hoffe, ich hab' Euch damit wieder ein paar "Schmunzel-Minuten" beschert!